.-.بنت الاكابر.-.

بسم الله ‘‘‘

كل انسان وله حد في النظر وله عزه وكرامه بين البشر ؛؛؛

اتمنى ان تكون هذه القصيده المتواضعه تعبر عن شي قليل من مجريات الحياه ,,
او عن جروح الزمن اللتي تلم بالانسان في حالة لاا يصعب تصديقها000





[poet font="Simplified Arabic,4,darkblue,normal,normal" bkcolor="transparent" bkimage="backgrounds/21.gif" border="none,4,gray" type=0 line=200% align=center use=ex length=0 char="" num="0,black" filter=" glow(color=skyblue,strength=5)"]
يوم جت بنت الاكابر تستثيـر الشـوق فيّـه =مالقت بي غير جرحٍ من طعون الوقت دامـي
واستفزتني وانا اللي مالبس ثـوب الخطيـه =يوم مرتني وغصن اليوسفيـه غـض نامـي
كن في نظـرة هدبهـا يـوم لـدت جاذبيّـه =تفتن العقل اللبيب وتسحر الرجـل العصامـي
قلت ابابـدا بالسـلام وكـان ردّت بالتحيـه =باختصر كل الـدروب وباحتويهـا باهتمامـي
وكان شفت بها خفوقٍ يتبـع الجيـه بجيـه=باقبل بخطوات واثق وافصح لها عن غرامـي
وكان شفت بها غـرور وكبريـاء وعنجهيـه= باشعل العزه بصدري وانتخي باغلى الاسامـي
لين اعلمها طبـاع البـدو ورجـال الحميـه =يوم واحدهم يموت ولاخضع لو كان ضامـي
واقبلت يمي بصمـت وعينهـا تشـر عليـه =واختلفت وضعت بين ورودها وتفاح شامـي
وقلت بالله لو سمحتي كـان جيتـي للاذيـه =ارحلي عنّي بصمت ومالـك ومـال الخصامي
قالت اشبـك ليـه مابـك للمواجـه مقدريـه =والا دبّ الخوف فيك وخايف اجرح في كلامي
قلـت لاوالله مانـي حاسـب لهـذي وذيـه =مايذل الا الضعيـف ولايخـاف الا الحرامـي
والا انا رجلٍ عزيز النفس لـو حالـي شقيـه =واضح وكلي شموخ ومبدأي يابنـت سامـي
قالت ابغا اسألك وابغا منـك اجابـه واقعيـه =ليه ثارت بك جروحك وانـت رجّـالٍ نظامـي
قلت مادام السؤال عـن الجـروح السرمديـه =جيتك بخطوة كريـمٍ حـل فـي دار الكرامـي
شاف بيت الشيخ واقبل يوم شاف النار حيّـه =رجل عِرْف ولايدوّر غيـر للنـاس الحشامـي
ايه انا واخـذي كلامـي واسمعينـي يابنيّـه =بعترفلك واعترافي مـو بضعـفٍ وانهزامـي
كنت انا في مامضالي عايـشٍ عيشـه هنيـه =عزتي تسمو وفعل الطيب يفـرض احترامـي
كان لي حلم وطمـوح وبالعطـا كفّـي نديـه =ماعرفت الشح يوم البخـل مايملـك زمامـي
كنت اصـارع للبقـاء ولابقـى فينـي بقيـه =كنت اجابه والسموم تلفّنـي والقيـظ حامـي
ليـن لوّعنـي زمـانٍ مابقلبـه مرحمـيّـه =نقّض جروحي عليُّ وْصابني بسهـام رامـي
وابتدا همّي يزيد وضـاع حلمـي مـن يديّـه =لين شفت الجرح تلو الجرح ينهش في عظامي
وقلت اداريها جروحٍ في ثرى صـدري خفيّـه =عل نـارٍ اشعلتهـا تنطفـي بـرد وسلامـي
لكن ابطت بي جروحي والخوي يلحق خويـه =كنها تعشق خفوقـي واتّمـادى فـي هيامـي
لين صـرت اليـوم تايـه لاشـداد ولامطيـه =وان كتبت ابيات زادوا عاذليني فـي ملامـي
يحسدوني يوم اصوغ الجرح بحروف ابجديـه =من رداهم والا انا اللي رافـعٍ ربـي مقامـي
ماكتبت الشعر لجل يشار لـي بيـن البريـه =هذا شاعر وانا اقول الشعر ورثٍٍ من عمامـي
ولاكتبت الشعر لجل استعطـف قلـوبٍ خليـه =بين ناسٍ ماتفـرق فـي حـلال ولاحرامـي
القصايد عندي اغلى مـن قصـور الواصليـه =قدرها عنـدي رفيـع وبالجواهـرماتسامـي
ماصخيت ابهـا لوجـهٍ بيّنـت فيـه الرديـه =حالـفٍ لا ماتسـاق الا علـى حـرٍّقطامـي
وانعزلت وعن عذولي مبتعـد وآخـذ نحيـه =دام انا اللي في طريق العز منصوبه خيامـي
وعقب هذا يوم جيتي وش لقيتي بـسْ فيّـه =مالقيتي غير جرحٍ من طعون الوقـت دامـي
[/poet]********
ولكم مني اجمل تحيه

[MARQ=RIGHT]اخوكم[/MARQ]