.-. الطعنــــــــــــــــــه.-.

غيب عني وان بغيت الجد عنـي لاتغيـب=لاتورّدني على المضمـاه بـارضٍ قاحلـه
هو صحيح انّ المفارق ماهو الشي الغريـب=عند من قامت حظوظـه فالوصـال تناحلـه
لكن الطعنه ليا من جات روحي من قريـب=من على روحي بعده استامنه وارتـاح لـه
وانت ياللي في عيوني شايفك اغلى حبيـب=ناظر بجسمي وشوف الجسم وشهـو ناحلـه
من ثلاث سنين اعيش بوضع مشبوه ومريب=همّي اشبه بالبحر وضلوع صدري ساحلـه
ولو اعدّدْ لك جروحٍ بالحشا عيّـت تطيـب=نحت نوحة من ينوح وكلّ حـي ٍّ نـاح لـه
لكن اسمع ياعديم الوصف يالغض الرطيـب=ياملوعنـي علـى مـرّ السنيـن الراحلـه
لاتْحَسْب انّي بخونك وانت لي شفُّ وطليـب=دام عطر الحب غيرك فالبشـر مافـاح لـه
وانت لو تطعن وانا من قسوة طعونك صويب=قلـت زيـد وسـوّ ماتبغـا وماترتاحـلـه
لكن ليامـن بغيـت تغيـب تكفـا لاتغيـب=في غيابك موت من يعشقك بـارضٍ قاحلـه