عواصيف الرياح

سريتي يا النجوم المرقبة و انا أطالعك=ويبقى الجدي وسهيل الجنوبي وأكبر أوجاعي
أبسهر لو سريتي و أن بقيتي ودي أسهر معك=ولو أن مالي و مال السهر مع كثرتك .. داعي
فإذا كنتِ على كثرة همومك.. وش بـ ياسعك؟=وصدري فيه كثرك .. ويحدنه حدب الأضلاعي
همومً وسط قلبي .. ودّي ابعدها كثر ما أجمعك=و أنا ماني لهذا يالنجوم المرقبة .. واعي
أنا واعي على شان أتامل فيك و أطالعك=وإلاّ هموم قلبي طول عمري .. تلوي ذراعي
يطول الشرح عنها و أنتي ان رحتي وش يرجعك=و أنا ودّي على الضوء الضئيل اعدّل أوضاعي
عسى نور الأمل ليا لاح لي ما يصير في موقعك=وإلاّ كان .. مت من القهر وعيوني تراعي
خلقك الله .. نورً للسماء يا نجوم في مطلعك=تشوف وتقتدي بك هالأوادم والله الراعي
ولكن من يشوف دموع عينً زاد فيها آلمعك=تلاقاها الكفوف وتحتضنها روس الأصباعي
ما دام أن الأوادم بالخطأ تشوفك .. ولا تسمعك=أبغمّض عيوني ليا حكوا .. و أسكّر أسماعي
يقولون: أنت مخطي..لو نبي نقنعك ، ما نقنعك!=و أنا لا رأيي ولا رأي غيري حاول إقناعي
ليا صار اللي يبي يقنعك .. عمره ما نوى ينفعك=وش أرجي من ورا أنصاف الحلول إن صارت أرباعي
صراحة!! ( خير ) يا القلب الصريح .. إن كانها توجعك=ما عاد أبي الصراحة دامها هي سبة أوجاعي
تبي منّي الصراحة .. للصراحة ما ني مشجّعك=ولكن ... حاول إنك لا تدوّر قلّة إسناعي
ألا يا قلب .. لا تحزن ، ترى اللي معك ما قاطعك=علاقة وصلهم مثل الرسالة .. في يد الساعي
أنا قلت: أني أسهر معك يا نجوم السماء .. ولا أتبعك=ولكن جت عواصيف الرياح .. و ضفّت شراعي